Ur@ngRant@u

1. Panitahan Ka Makan jo Minum

Sipangka : Datuk Maruhum
Sialek : Datuk Nagari Basa

Sipangka :
Datuk Nagari Basa, sambah tibo bakeh Datuk, sambah manyambah dipulangkan kapado Allah, kato sajo dipakatokan.

Maagak-I di hari nan sahari nangko, janjang batingkek bandua batapuak, duduak sahamparan agak saedaran, manimbang sapanjang adat mangaji sapanjang alua, alah ciek jo duo, duo jo tigo, alah banamo basalasai.

Pun baato hanyo lai, manantang jamba nan baatap Kumbuak nan baatua, supayo nak mintak diparenai, sakian sambah tibo bakeh Datuk.

Sialek :
Sampai .. Datuk ? Apolah nan manjadi buah panitahan Datuk cako, maagak-I rundiangan datuak nan ka tangah, sunat kato dek baulang, pasa jakan dek batampuah, panitahan Datuak nan ka hambo ulang.
Maagak-i di hari nan dahulu, di sirieh nan bacabiak, dipinang nan bagatok, ka hadapan karib jo kabiah, ipar jo bisan, korong jo kampuang, nak mahadiri pakarajaan nangko. Adopun di hari sahari nangko, janjang batingkek bandua batapuak, duduak sahamparan tagak saedaran, maninmbang sapanjang adat mangaji sapanjang alua, alah ciek jo duo, duo jo tigo, alah banamo basalasai.
Limbak nan daripado itu, tumbuah nan bak banyiah tabik nan bak padi, tabik di silang nan bapangka, karakok nan bajunjuang, pakarajaan nan bapangka, jamba nan baatap kumbuak nan baatua, iyo bana nan mintak di parenai, kan baitu bana jinih panitahan Datuk ?

Sipangka :
Iyo bana.

Sialek :
Ma … Datuk Maruhum, sapanjang buah panitahan Datuak nan ka tangah, alah dalam adat nan bapakai, dalam cupak nan baiisi, dalam ragi nan takambang.
Tapi sungguahpun baitu, lamak sirieh lega carano, lamak kato lega bunyi, lamak lauak dek pamasak, elok kato jo mupakat, buruak kato di luanyo, hambo bawo kato jo mupakat, jo nan duduak sahamparang tagak saedaran, saba Datuk jo panitahan.
Laikoh di kanduang adat salingka pusako, nan baitu Datuk ? Itulah bana nan hambo antakan bakeh Datuk.

Sipangka :
Sampai … Datuk ?
Sapanjang buah panitahan Datuk bakeh hambo, sapanjang buah panitahan hambo nan katangah, alahkoh dalam cupak nan baisi, dalam adat nan bapakai, dibawo kato jo mupakat, kan baitu bana buah panitahan Datuk ?

Sialek :
Iyo bana.

Sipangka :
Tibonyo alah dalam adat nan bapakai, kato dibawo jo mupakat, Datuk.

Sialek :
Nan kato alah dalam adat lamo pusako usang, kato ka hambo bawo jo mupakat, saba mananti malah Datuk.

Sipangka :
Hambo mananti sakiro-kiro.

Datuk Nagari Basa membawa kata mupakat dan kemudian mengembalikan rundingan tadi kepada Datuk Maruhum.

Sialek :
Ma Datuk Maruhum, di hari nan cako Datuk saba jo panitahan, hambo mambawo kato mupakat, jo nan duduak sahamparan tagak saedaran, picak nan satapiak bulek nan sagiliang, adat nan sapakai.
Sapanjang parmintaan Datuk nan ka tangah, tibonyo alah dalam adat nan bapakai, dalam cupak nan baisi, pintak buliah kahandak balaku, itu bana nan hambo antakan bakeh Datuk.

Sipangka :
Samapi … Datuk ? Maagak-I rundiangan Datuk nan ka tangah, nan baukua nan bajangko, nan babarih nan babaleh, sabarih tidak namuah hilang, satitiak tidak namuah lipua, sabuah pintak buliah kahandak balaku, tinggi hambo junjuang gadang hambo amba, itulah kato nan diantakan bakeh Datuk.

Sialek :
Sampai … Datuk ? Kok hilia lah sarangkuah dayuang, mudiak lah satimbang galah, nan kito baapo Datuak ?

Sipangka :
Nan kito rancak baparantian.

Sumber : Sumarak Nagari – Alur Pasambahan dan Pidato Adat Minangkabau
www. Cimbuak.net / Ditulis oleh R. St. Tandiko dan M.I. St. Rajo Batuah

2. Pidato Pasambahan Manjapuik Marapulai : Adaik Bakarilahan

Ujuang :
Manolah Baliau datuak ….

Pangka :
Lalukan lah Datuak ….

Ujuang :
Sungguehpun ka bakeh Datuak surang timpoan salam tumpuan sambah, wujuiknyo ka bakeh nan basamo, pangana batin ka nan rapek. Sawujuik sambah jo simpuah, sabarek bungka nan piawai, naraco luruih main daun, indak basibak jo basisieh, bukan bahinggo jo babateh, ancau dek rueh nan sabuku.

Palupueh batang kasumbu
Pucuek manimpo aka jumbai
Rabah tajelo dalam padi

Sungguh pun ambo duduek baselo
Bukanlah urang cadiek pandai
Wujuik nyo tagak nan badiri

Mulonyo jalo diserakkan
Kanai kulari nan bapalun

Mulonya kato disambahkan
Disusun jari minta ampun

Gadanglah aie di Talatai
Batang pinggago rang papati

adaik nan samo kito pakai
Pusako nan samo ditapati

Adaik limbago di Minangkabau, nan diwariskan dek urang tuo dahulunyo, angkuek balirik bak karangan, arak batambo bak mansiang. Nan sawajah kini nangko, timpak di badan diri ambo, barek tajujuang di kapalo, panjang tasandang pado bahu, buek melelokan niek mukasuik, dek silang nan bapangka, karajo baiek nan bapokok, karakok nan bajunjuang, di hari nan sahari kini. Kok indak tasuo di liriknyo, bukan ta-erak di tambonyo, pulang maklum bakeh rang banyak. Jikok lai di lae lakek atok, indak di rasuek manjariau, tagah dek tanah balantai batu, keramik sajo panyudahi, lai kolah indak ka mangapo. Babari juo molah ambo pitunjuak jo putuah, mah Datuak ….

Pangka :
Lah ukue sampai, Datuak ….

Ujuang :
Bilang sakiro itulah Datuak ….

Pangka :
Bana pulo tumah sapanjang panitahan Datuak nan ka tangah, jikok didanga lah elok bunyi, jikok dipandang lah elok rupo. Namun samantang pun baitu, ambue sa ambue kato tibo, langkah salangkah kok tak sampai, di nan sulik mananai budi, di nan rumik kilaf kok tibo. Nak jaan tasuo nan bak kian, elok di pakai barih adaik, papatah adaik nan kewi. Urang banyak salimbago, urang tuo sabuah hukum, pangulu saundang-undang, ulama samo sakitab. Nan nyo satali sajinjiangan, satampuek sabirumbuang, suto jo turang nak salasai, nak samo naiek ka antaan, direnjek kato jo mufakat, basaba Datuak samantaro, mah Datuak …

Ujuang :
Bapakaikan sifat demikian, mah Datuak ….

…. Pihak si pangka berunding sejenak…….

Pangka :
Baliau Datuak …

Ujuang :
Manitahlah, Datuak …

Pangka :
Ikomah sambah nan ka ambo kumbalikan ka bakeh Datuak, sabarih rundingan Datuak nan ka tangah, jikok di ambo indak ka baulang kili batikam jajak, baa sabab mako baitu, baulang kili kok nyo sipi, batikam jajak kok nyo cupu, baulang kato kok batimbang, ujuangnyo sajo ambo ambiek.. Apolah nan manjadi ujuang rundingan Datuak tadi, adaik nan samo kito pakai, pusako nan samo ditapati, adat limbago di Minangkabau, nan diwariskan dek urang tuo dahulunyo, iyo angkueh balirik bak karangan, arak batambo bak mansiang. Di hari nan sahari kini, kok kurang tasuo di liriknyo, kurang erak di tambonyo, pulang maklum bakeh nan banyak, kan baitu nan manjadi ujuang rundiang Datuak tadi.

Ujuang :
Bana tumah Datuak …

Pangka :
Jikok diinok dimanuangkan, itulah kato sabananyo, rumik malenggang di nan sampik. Tapi samantangpun baitu, lah diukue lah ditimbang, lah di pailie pamudiekkan, lah di paiyo-patidokan, lah dapek kato nan sasuai rundiang nan saukue. Nan pitua dari ambo, tipak di badan diri Datuak, ka bukik indak kakurangan angin, ka lurah indak kakurangan aie, tagah dek kito iduik di rantau, mak lai di lae lakek atok, indak di rasuek manjariau, tagah dek tanah balantai batu, lai keramik panyudahi, jo karpet sajo kito raok-i, mah Datuak …

Ujuang :
Bahabisi adek jo karilaan, mah Datuak …

Pangka :
Lai sawujuik sapangana kito, mak Datuak …

Ujuang :
Indak doh, lah dapek pulo ambo aie nan bak satitiek, rantiang nan bak sasakah, barupo kato nan sapatah, Aie satitiek bulieh ambo lawikkan, tanah sakapa nak ambo gunuangkan, rantiang sasakah nak manjadi batang, batang nan elok ka sandaran, lah baiek manyanang hati ambo, mah Datuak….

Pangka :
Dang dikatokan hati Datuak lah sanang, hati ambo lah baitu pulo, mah Datuak…

Sumber : http://www.cimbuak.net / Ditulis oleh Damrus Lukman (Paduka)

3. Pasambahan Manjapuik Marapulai : Pambuka Kato

Ujuang :

Assamu’alaikum wr. Wb.

Pangka :

Wa’alaikum salam wr. Wb.

Ujuang :

Maa baliau, datuak ….

Pangka :

Sambahkanlah, Datuak ….

Ujuang :

Ka bakeh Datuak pulangnyo sambah ambo, mah Datuak ….

Pangka :

Kapado Allah kumbalinyo, mah Datuak ….

Ujuang :

Ikomah sambah nan ka ambo pulangkan ka bakeh Datuak. Pendek komah Datuak, kapendek-an nyo itu iyo nak basingkok daun ka batariek buah sajo. Sakiro-kiro nak mangatokan kato hati, nak mambanakan kato bana. Manolah kato hati nan ka dikatokan, kato bana nan ka dibanakan, di sinan kan takana pulo ambo dek rawi orang tuo kito :

Anak ikan dalam tabek

Tabek nak urang koto tangah

Gambo tajelo dalam padi

Kato dahulu basicapek

Kato kudian basitinah

Lai kolah raso ka manjadi

Pituah juo molah ambo ka dibari, mah Datuak….

Pangka :

Lah ukue sampai, Datuak….

Ujuang :

Bilang sakiro itu lah, Datuak….

Pangka :

Bana pulo tumah sapanjang panitahan tuan Datuak ka tangah

Iyo anak ikan dalam tabek

Tabek nak urang koto tangah

Gambo tajelo dalam padi

Iyo kato dahulu basicapek

Kato kudian basitinah

alah raso ka manjadi, mah Datuak…

Ujuang :

Lah ukue sampai, Datuak….

Pangka :

Bilang sakiro itu lah, Datuak….

Ujuang :

Indak lai doh, dang dikatokan lah dapek ambo aie nan bak satitiek, rantiang nan bak sasakah, walau kato nan sapatah, lah baiek manyanang hati ambo, mah Datuak…

Pangka :

Dang dikatokan hati tuan lah sanang, hati ambo lah baitu pulo, mah Datuak….

Bersambung …

Note :
Pidato pasambahan Manjapuik marapulai, disusun oleh kawan-kawan di “Kacimpuang pamenan Mandi” di bawah arahan Halvi Hamid Mangkoto Sati, yang anggotanyo terdiri dari anak Nagari Muaropaneh Kabupaten Solok nan ado di Jakarta dan sekitarnyo.

Naskah ini telah beberapa kali dikaoan (dipraktekkan) dalam acara manjapuik marapaulai manjalang baralek di gedung atau di aula. Diharapkan naskah ini dapat membantu memberikan arah dalam acara pidato pasambahan.